طرق تنظيف ادوات المطبخ

بعض طرق تنظيف ادوات المطبخ

اسفنجه الحوض بقت مش نضيفه

بعد ما خلصتي غسيل كل حاجة لقيتي إن إسفنحة التنظيف شكلها زي ما يكون قديم ومش نظيفة ونفسك ترجعيها زي الأول يبقى انقعيها في مية سخنة مضاف إليها ملح خشن أو بيكربونات الصودا أو صابون الغسيل وبعد ساعة اغسليها كويس بالصابون والمية.

بقايا الاكل والدهون سدت حوض المطبخ

ساعات كتير البلاعة الخاصة بالحوض ممكن تتسد نتيجة تجمع كمية كبيرة من بقايا الأكل عليها أو الدهون وعلشان تتغلبي على المشكلة دي يبقى هاتي كوباية كلور + كمية كبيرة من المية وضيفيها إليها وافتحي حنفية المية السخنة لمدة عشر دقائق وكل حاجة هترجع زي الأول وأحسن
سيراميك المطبخ

علشان تلمعي سيراميك المطبخ سواء سيراميك الجدران أو الأرض يبقى دوبي فنجان خل أبيض + عصير ليمون + ملعقة كحول نقي "موجود في الصيدليات" في ميه فاترة ولمعي بيه السيراميك وهتشوفي الفرق بنفسك.

ولو عايزة ريحة المطبخ تبقى حلوة بعد ما تخلصي يبقى ضيفي إلى مية المسح عصير 5 ليمونات وهتشمي الريحة بنفسك

ريحه البصل ماسكه في لوحه التقطيع
علشان تتخلصي من رائحة البصل والثوم والسمك وغيرها من الروائح اللي ممكن تكون موجودة على لوح التقطيع يبقى ادعكي لوح التقطيع بنصف ليمونة أو حطي عليه طبقة معجون عبارة عن "كوباية ميه + بيكربونات الصودا "وسيبيهم لمدة ساعة وبعد كده اغسليه كويس بالصابون والمية.
المعالق والشوك والسكاكين عايزه تلميع

علشان تلمعي السكاكين والمعالق وأدوات المائده غير الفضية يبقى دوبي شوية مسحوق غسيل في لتر ماء + عصير ليمونة وحطيه على نار هادية مع المعالق اللي أنت عايزة تنظفيها وسيبيه لغاية ما يغلي لمدة ربع ساعة...وبعد كده سيبيه لغاية ما يبرد وبعد كده اشطفي المعالق أو السكاكين بالميه وسيبيهم لغاية ما ينشفوا في الهواء وبلاش تنشفيهم بفوطة وهتلاقيهم بقوا يلمعوا كأنك لسه جايباهم।
حله المطبخ

من المشاكل اللي ممكن تقابلك وتبقي مش عارفة تعملي معاها إيه مشكلة إن الحلة يكون فيها سواد من تحت وعلشان تتخلصي من المشكلة دي يبقى افركي السواد ده بشوية ملح خشن وليمون وبعد كده اشطفيها كويس واغسليها بالصابون وفرشاة خشنة وبعد كده اشطفيها كويس بالميه وهتشوفي الفرق بنفسك هتلاقي الحلة رجعت جديدة.

الكوبايات مش بتلمع

من ضمن المشاكل اللي ممكن تقابلك مشكلة إن الكوبايات والأطباق مش بتلمع بالرغم من إنك غسلتيها أكتر من مرة بمسحوق غسيل فيه مادة ملمعة لكن مفيش فايدة!!!
وعلشان تتخصلي من المشكلة دي يبقى بعد ما تغسليها بالصابون حطيها في طبق فيه ميه فاترة مذاب فيها ملح وسيبيها لمدة ساعة وبعد كده اشطفيها كويس قوي وسيبيها على ترابيزة المطبخ علشان تنشف في الهواء من نفسها واوعي تنشفيها بفوطة المطبخ لأنها هتخليها تفقد لمعانها.

أما بالنسبة للأكواب الكريستال فاشطفيها بميه فاترة مضاف إليها قطرات من الكحول الأبيض وسيبيها لغاية ما تنشف من نفسها.

ريحه اللحمه ماسكه في المفرمه

ساعات كتير لما تيجي تفرمي لحمة في المفرمة ريحة اللحمة بتفضل موجودة فيها ومهما تحاولي تغسليها بمساحيق ليها ريحة حلوة إلا إن ريحة اللحمة بتفضل موجودة برضه.. نفس الموضوع ده بيتكرر لما تيجي تطحني بهارات ريحة البهارات برضه بتلزق هي كمان...
وعلشان تتخلصي من المشكلة دي نهائي يبقى هاتي عيش محمص واطحنية في المطحنة أو المفرمة وبعد كده اغسليها بنفسك وأوعدك إنك مش هتلاقي أي آثار لريحة الحاجة اللي اتطحنت لأن العيش هيمتص أي ريحة.

الدهون اللي لازقه علي الخلاط
ساعات كتير بتستخدمي الخلاط علشان تضربي فيه خليط فيه دهون بس للأسف الشديد ساعات الخليط ده بيلزق فيه وبتبقي مش عارفة تطلعيه ازاي...
وعلشان تحلي المشكلة دي يبقى حطي في الخلاط شوية ملح +قشر ليمون +كوباية ميه سخنة واقفلي الخلاط ورجي الخليط ده جواه أكتر من مرة كويس وبعد كده اغسليه زي ما أنت عايزة وهتشوفي الفرق بنفسك.